Vizite historike ne Beograd Parmelin ja konfirmoi ne Davos (WEF) redaktorit te gazetes zvicerane ne shqip LeCanton27.ch
Nefail MALIQI
Kryeredaktor i gazetës zvicerane në gjuhën shqipe LeCanton27.ch
Presidenti i Konfederatës Zvicerane, Guy Parmelin, do të udhëtojë nesër për në Serbi më 28 prill. Në Beograd, ai do të mirëpritet nga homologu i tij, Aleksandar Vuçiç. Kjo vizitë shumë simbolike vjen pasi Zvicra njohu pavarësinë e Kosovës në vitin 2008, një veprim që Serbia ende e kundërshton.
Kjo vizitë u konfirmua për herë të parë nga Presidenti zviceran në Forumin Ekonomik Botëror (WEF) në Davos, në një intervistë me një gazetare shqiptare me qendër në Gjenevë, redaktore e gazetës zvicerane në gjuhën shqipe LeCanton27.ch.
Kjo është vizita e parë e një presidenti zviceran në Serbi në tetëmbëdhjetë vjet, një mungesë kryesisht për shkak të çështjes së Kosovës. Zvicra ishte ndër vendet e para që njohu pavarësinë e Kosovës, të shpallur më 17 shkurt 2008.
Në atë kohë, presidenca zvicerane mbahej nga Pascal Couchepin. Po atë vit, gjatë një dreke pune me gazetarë të huaj në Bernë, ai e shpjegoi këtë vendim. Kur u pyet, veçanërisht nga një gazetar, për imazhin e kosovarëve në Zvicër, ai theksoi se « Kosovarët tani përbëjnë një komunitet të rëndësishëm në Zvicër dhe përfaqësojnë një shembull integrimi dhe suksesi ».
Lidhur me njohjen e Kosovës, Pascal Couchepin deklaroi: « Ne u përballëm me dy të këqija: nga njëra anë, një komunitet të madh dhe të integruar mirë kosovar në Zvicër; nga ana tjetër, marrëdhënie të mira me Serbinë dhe Rusinë. Pavarësisht presionit, ne zgjodhëm të keqen më të vogël nga dy të këqijat duke e njohur Kosovën, sepse mosveprimi do të kishte qenë më keq për vendin tonë ».
Si një vend neutral, Zvicra është e përfshirë në mënyrë aktive në dialogun e Brukselit midis Beogradit dhe Prishtines dhe ka organizuar disa takime midis palëve, veçanërisht në Solothurn. Ministri i Jashtëm zviceran Ignazio Cassis, së bashku me ish-presidenten Karin Keller-Sutter, theksuan se « siguria në Ballkan do të thotë edhe siguri në Zvicër ».
Pas takimeve me kryeministrin e Kosovës Kurtin, presidenti i Zvicres, neser ne Beograd dhe Shkup, do të takoj homologun serb Vucic dhe maqedonasen Siljanovska
Vizita e Guy Parmelin në Beograd duket kështu e ndjeshme dhe shumë simbolike, duke pasur parasysh se Zvicra e njohu Kosovën në vitin 2008, një pavarësi që Serbia ende nuk e njeh. Presidenti zviceran ishte gjithashtu ndër udhëheqësit e parë evropianë që uroi Albin Kurtin për fitoren e tij zgjedhore në zgjedhjet e 28 dhjetorit në Kosovë.
Ekonomikisht, Serbia, ashtu si Kosova, është një partner i rëndësishëm tregtar i Zvicrës në Ballkanin Perëndimor. Që nga viti 1991, Zvicra ka ofruar më shumë se 650 milionë franga zvicerane në ndihmë financiare për Serbinë.
Kandidate për anëtarësim në BE që nga viti 2012, Serbia filloi negociatat në vitin 2014. Megjithatë, procesi po përparon ngadalë për shkak të sfidave të brendshme dhe të jashtme, duke përfshirë marrëdhëniet e saj me Rusinë dhe Kinën, si dhe kritikat në lidhje me përafrimin e saj me politikën e jashtme evropiane.
Për më tepër, situata e pakicave mbetet shqetësuese, veçanërisht ajo e shqiptarëve etnikë në Luginën e Preshevës (Preshevë, Bujanoc dhe Medvegjë), një rajon në Serbinë jugore. Sipas raporteve ndërkombëtare, këto popullata përballen me diskriminim, veçanërisht përmes « pasivizimit » administrativ të adresave, i perceptuar si një formë e përjashtimit institucional.
Këto praktika kanë kontribuar në emigracion të konsiderueshëm në Evropë, veçanërisht në Zvicër. Sipas Zyrës Federale të Statistikave, më shumë se 55,000 shtetas serb jetojnë në Zvicër, përfshirë gati 13,800 shqiptarë me origjinë nga Lugina e Preshevës (Serbia jugore).