Një ushtar ukrainas u mëson grave se si të përdorin pushkët gjatë një kursi kombëtar trajnimi për rezistencë për popullsinë lokale në rajonin Kharkiv të Ukrainës, të premten, më 13 shtator 2024.
Një botë jo vetëm për burra: Si po e ndryshojnë gratë ushtrinë ukrainase
Më shumë se 70,000 gra shërbejnë në forcat e armatosura ukrainase, duke përfshirë gati 20,000 në role luftarake. Euronews takoi tre prej tyre.
Në Ukrainë, gratë nuk janë të detyruara të regjistrohen në ushtri, por ato mund të bëhen vullnetare. Që nga fillimi i luftës së zhvilluar nga Rusia, shumë prej tyre kanë marrë pjesë në mbrojtjen e vendit të tyre.
Yulia Sidorova dhe Katerina Prymak u takuan në vijën e frontit, kur Moska tashmë kishte aneksuar Krimenë dhe po zhvillonte luftë në Ukrainën lindore.
Yulia Sidorova thotë se donte t’u bashkohej forcave të armatosura gjatë Revolucionit Maidan. « Kishte një ndjenjë të fortë se gjithçka do të mbaronte shpejt dhe unë doja të isha pjesë e saj », kujton ajo.
Në atë kohë, gratë ende nuk kishin qasje në role luftarake, thekson Katerina Pryimak: « Ato ishin zyrtarisht të rekrutuara për detyra jo-luftarake, por në realitet, ato ishin në vijën e parë. »
« Për tre vjet, ne mblodhëm sa më shumë gra, ushtare dhe veteranë të ishte e mundur për të ndryshuar këtë situatë. Ato u bashkuan për këtë kauzë. Aktiviste, politikane dhe shkencëtare ishin të gjitha të përfshira », shpjegon ajo. « Në Ukrainë, shoqëria civile është shumë e rëndësishme. Dhe ne po e ndërtojmë Ukrainën me duart tona. »
Katerina Pryimak bashkëthemeloi Lëvizjen Ukrainase të Veteraneve të Grave, UWVM, ose Veteranka, komunitetin e grave ukrainase me përvojë luftarake.
Veteranka, që do të thotë « veterane femër », mbështet gratë në ushtri, mbron të drejtat e grave në sektorin e sigurisë dhe mbrojtjes, i ndihmon ato të riintegrohen në jetën civile dhe inkurajon lidershipin e grave dhe pjesëmarrjen aktive në rindërtimin e Ukrainës.
Katerina Pryimak, një infermiere luftarake dhe veterane lufte, shpjegon se që kur Ukraina zyrtarisht lejoi gratë të mbanin pozicione luftarake në ushtri sipas një ligji të vitit 2018, gjërat kanë ndryshuar. Gratë u lejuan zyrtarisht të shërbenin në role të tilla si pushkatare, snajperiste, shofere dhe skaute.
Sipas Veteranka, 63 pozicionet e para luftarake u hapën për gratë në vitin 2018.
Që atëherë, lëvizja është rritur, si dhe nevojat e grave në vijën e parë të frontit. Katerina Prymak beson se do të ketë më shumë gra në ushtri në të ardhmen: « Nuk ka zgjidhje tjetër. » « Sa më shumë gra të ketë në ushtri, aq më rehat dhe e sigurt do të ndihet secila prej tyre. Kështu funksionon, » vazhdoi ajo.
Kur Rusia filloi pushtimin e saj në shkallë të gjerë të Ukrainës në fillim të vitit 2022, dhjetëra mijëra gra u deklaruan vullnetare për t’u bashkuar me ushtrinë dhe tani janë një pjesë integrale e forcave të armatosura ukrainase.