Harris dhe Trump kritikojnë qëndrimet politike të njëri-tjetrit në debatin e tyre të parë
Nënpresidentja Harris, 59 vjeçe, kritikoi synimin e Trumpit për të vendosur tarifa të larta ndaj mallrave të huaja, një propozim që ajo tha se do të ishte një taksë për klasën e mesme, ndërsa foli mbi planin e saj për të ofruar përfitime tatimore për familjet amerikane dhe bizneset e vogla.
“Donald Trump na la nivelin më të ulët të punësimit që nga Depresioni i Madh (rënia e madhe ekonomike në Shtetet e Bashkuara e viteve 1930)”, tha Harris, duke iu referuar viteve të tij si president nga viti 2017 deri në vitin 2021, shkruan Zëri i Amerikës, duke cituar AP dhe Reuters.
Niveli i papunësisë arriti kulmin në 14.8% në prill të vitit 2020 dhe ra në 6.4% kur ai u largua nga detyra.
Trump, 78 vjeç, kritikoi Harrisin për inflacionin e lartë gjatë mandatit të administratës së Presidentit Biden, megjithëse ai e mbivlerësoi nivelin e rritjes së çmimeve.
Ai gjithashtu iu drejtua shpejt çështjes së tij kryesore, emigracionit, duke pretenduar përsëri pa prova se emigrantët nga “azilet e të çmendurve” po kalojnë kufirin jugor të Shteteve të Bashkuara me Meksikën.
Inflacioni, tha ai, “ka qenë një katastrofë për njerëzit, për klasën e mesme dhe gjithë të tjerët.”
Debati filloi me një shtrëngim duarsh mes dy rivalëve, të cilët nuk ishin takuar më parë.
Kandidatët gjithashtu shkëmbyen kritika për luftën mes Hamasit dhe Izraelit në Rripin e Gazës, si dhe agresionin rus në Ukrainë, megjithëse asnjëri nuk ofroi plane specifike për zgjidhjen e këtyre konflikteve.
Demokratja Harris akuzoi republikanin Trump se ishte i gatshëm të të tërhiqte mbështetjen e Shteteve të Bashkuara për Ukrainën për të fituar favorin e Presidentit rus Vladimir Putin, duke e quajtur Trumpin një “turp”, ndërsa Trump pretendoi se Harris “urren” Izraelin, një pohim që ajo e hodhi poshtë.
Trump kritikoi Presidentin Biden dhe Nënpresidenten Harris për tërheqjen e pa organizuar të trupave amerikane nga Afganistani, duke thënë se ata lanë duart e talebanëve pajisje ushtarake amerikane me vlerë prej miliarda dollarësh.
Trump, i cili ka kaluar javë të tëra duke bërë sulme personale ndaj Harrisit, duke përfshirë fyerje raciste dhe seksiste, kryesisht shmangu fyerjet në fillim të debatit, por u bë gjithnjë e më i zëmëruar nga kritikat e Harrisit.
Trump u pyet nga moderatorët për një nga ato sulme, kur ai tha në një konferencë me gazetarë afrikano-amerikanë në korrik se Harris së fundmi ishte “bërë një person me ngjyrë”.
“Nuk më intereson aspak kjo çështje”, tha ai. “Çfarëdo që ajo dëshiron të jetë është në rregull me mua.”
Harris, me origjinë afro-amerikane dhe aziatike, u përgjigj: “Unë mendoj se është një tragjedi që ne kemi dikë që dëshiron të jetë president, i cili vazhdimisht gjatë karrierës së tij është përpjekur të përdorë racën për të përçarë popullin amerikan”.
Ajo kritikoi Trumpin për shpalljen fajtor nga një juri për fshehjen e pagesave për një aktore e filmave pornografikë, si dhe paditë e tij të tjera dhe një gjyq civil për sulm seksual. Trump hodhi poshtë këto akuza dhe sërish akuzoi Harrisin dhe demokratët se kanë orkestruar të gjitha paditë ndaj tij pa prova.
Ish-Presidenti Trump gjithashtu përsëriti pretendimin e tij të rremë se zgjedhjet e vitit 2020, të cilat i fitoi demokrati Joe Biden, ishin manipuluar dhe e quajti Harrisin një “marksiste” dhe pohoi në mënyrë të rreme se migrantët kanë shkaktuar një rritje të madhe të krimit të dhunshëm në vend.
Ky mund të jetë debati i vetëm mes tyre në fushatën për zgjedhjet presidenciale të 5 nëntorit. Debati mbahet tetë javë përpara ditës zyrtare të zgjedhjeve, por vetëm disa ditë përpara fillimit të votimit të hershëm në disa nga 50 shtetet e vendit.
Debatet presidenciale nuk ndryshojnë domosdoshmërisht mendjet e votuesve, por ato mund të jenë shumë të rëndësishme. Paraqitja e dobët e Bidenit në debatin me Trumpin në qershor çoi në tërheqjen e tij nga gara për president më 21 korrik.
Debati, i organizuar nga kanali ABC, u mbajt në Qendrën Kombëtare të Kushtetutës në Filadelfia.
Siç ishte rënë dakord nga drejtuesit e fushatave, nuk kishte audiencë të drejtpërdrejtë dhe mikrofonat e kandidatëve ishin të fikur në momentet kur kandidatët nuk e kishin radhën e tyre për të folur.
Debati 90 minuta, Trump foli 5 minuta më shumë se Kamala Harris
Debati presidencial në Filadelfia, zgjati afërsisht 90 minuta, teksa ish-presidenti Donald Trump kishte folur për rreth 40 minuta e 50 sekonda.
Ndërsa zëvendëspresidentja Kamala Harris përdori afërsisht 35 minuta e 31 sekonda.
Ndërsa debati është krijuar për t’u ofruar të dy kandidatëve një shans të barabartë për t’iu përgjigjur pyetjeve, ata mund të zgjedhin të mos përdorin kohën maksimale të caktuar.
Moderatorët kanë lënë gjithashtu më shumë kohë për përgjigje.
Ja kush e fitoi debatin presidencial Trump- Harris
Në një debat 90-minutësh, Harris shpesh tronditi ish-presidentin – duke e shtyrë atë në mbrojtje të turmave që dolën në tubimit të tij, për sjelljen e tij gjatë sulmit të 6 janarit në kryeqytetin e SHBA-së dhe ndaj zyrtarëve që shërbyen në administratën e tij që atëherë janë bërë kritikë të hapur të fushatës së tij.
Nëse debatet janë fituar apo janë humbur në atë se në cilat çështje kandidatët kanë më shumë avantazhe, ku ata janë më të forte dhe ku mbrohen për të shmangur pikat e dobëta, mbrëma e të martës anonte shpesh në favor të zëvendëspresidentes.
Herë pas here, ndërsa debati avanconte, Harris e bëri Trumpin që të rrinte në mbrojtje, me një sërë goditjesh që ai u ndje i detyruar t’i adresonte. Ajo e quajti atë të dobët. Ajo tha se liderët e huaj po qeshnin me të. Ajo tha se njerëzit u larguan herët nga tubimet e tij nga “lodhja dhe mërzia”.
Harris hyri në këtë debat me dobësi të qarta në mendjet e shumë amerikanëve, për tema si inflacioni, imigracioni dhe tërheqja nga Afganistani. Në pjesën më të madhe, Trump nuk ishte në gjendje t’i jepte goditjet e tij retorike – dhe në ditët në vijim ai mund të pendohej për mundësinë e humbur.
* Korrenspondent i BBC në Amerikën e Veriut