Bernë, 19 nëntor –Zvicra i jep Kosovës 9.6 milionë euro për përmirësimin e menaxhimit të ujit. Ky projekt synon të sigurojë mbrojtje dhe menaxhim efikas të burimeve ujore, përmirësimin e infrastrukturës ujore, uljen e ndotjes së ujit dhe rritjen e efikasitetit të përdorimit të ujit në Kosovë, njofton gazeta zvicerane ne shqip Le Canton27.ch
Ministria e financave e Kosovës tha se nënshkroi një marrëveshje me Zvicrën për të marrë grante në shumën prej 9 milionë frangash zvicerane (10.2 milionë dollarë/9.6 milionë euro) për të përmirësuar sistemin e menaxhimit të ujit në Kosovë.
Gazeta zvicerane në shqip Le Canton27.ch ka mesuar se financimi mbulon fazën e dytë të Menaxhimit të Integruar të Burimeve Ujore në Kosovë, një program prej 20 milionë eurosh i zhvilluar bashkërisht nga Agjencia Zvicerane për Zhvillim dhe Bashkëpunim (SDC) dhe qeveria e Kosovës, tha ministria e financave në një njoftim për media të hënën.
Gjatë fazës fillestare, nga maji 2020 deri në prill 2024, Zvicra ndau 8.6 milionë franga për projektin. Faza e dytë është planifikuar të zgjasë nga maji 2024 deri në prill 2029, sipas faqes së internetit të projektit.