Pak orë para fillimit të muajit të madhërueshëm të Ramazanit, shumë personalitete botërore dhe ndërkombëtare, si dhe përfaqësues të komuniteteve muslimane në mbarë globin, kanë uruar fillimin e muajit të agjërimit dhe solidaritetit me mesazhe për lutje, paqe dhe unitet. Edhe në Zvicër, ku ndodhet selia evropiane e OKB-së në Gjenevë, janë dhënë urime dhe mesazhe me këtë rast. Sekretari i Përgjithshëm i OKB-së ka përcjellë mesazhin e tij tradicional për fillimin e Ramazanit, duke theksuar rëndësinë e paqes, bashkëjetesës dhe solidaritetit në një kohë sfiduese për botën.
Po ashtu, me një mesazh urimi është drejtuar edhe Hfz. Mehas Alija, Kryetar i Komunitetit Musliman Shqiptar në Zvicër (KMSHZ), i cili ka theksuar rëndësinë e përkushtimit shpirtëror, ndihmës ndaj nevojtarëve dhe forcimit të harmonisë ndërfetare.
Për këto mesazhe dhe zhvillime ka njoftuar gazeta zvicerane në shqip LeCanton27.ch.
Ja mesazhi Sekretari i Përgjithshëm i OKB-së z.Antonio Guterres:
Për myslimanët në mbarë botën, muaji i shenjtë i Ramazanit është një periudhë e shenjtë reflektimi dhe lutjeje.
Ramazani përfaqëson gjithashtu një vizion fisnik shprese dhe paqeje. Por për shumë anëtarë të familjes njerëzore, ky vizion mbetet i largët.
Nga Afganistani në Jemen, nga Gaza në Sudan dhe më gjerë, njerëzit po vuajnë tmerret e konfliktit, urisë, zhvendosjes, diskriminimit dhe më shumë.
Në këto kohë të vështira dhe të ndara, le t’i kushtojmë vëmendje mesazhit të qëndrueshëm të Ramazanit.
Për të kapërcyer ndarjet. Për t’u ofruar ndihmë dhe shpresë atyre që vuajnë. Dhe për të mbrojtur të drejtat dhe dinjitetin e çdo personi.
Çdo vit, unë bëj një vizitë të veçantë solidariteti në një komunitet mysliman dhe bashkohem në agjërim. Dhe çdo vit kthehem i inkurajuar nga fryma e paqes dhe dhembshurisë së Ramazanit.
Uroj që ky Muaj i Shenjtë të na frymëzojë të punojmë si një për të ndërtuar një botë më paqësore, bujare dhe të drejtë për të gjithë njerëzit.
Ramadan Kareem.
Ja mesazhi Hfz. Mehas Alija, kryetar i KMSHZ në Zvicër
Komuniteti Musliman Shqiptar në Zvicër njofton besimtarët muslimanë në Zvicër se me perëndimin e diellit, sonte fillon muaji i bekuar i Ramazanit, ndërsa nesër, më 19.02.2026, është dita e parë e agjërimit.
Ramazani është një nga shtyllat themelore të Islamit dhe paraqet obligim për çdo musliman e muslimane të rritur, të shëndoshë dhe me arsye. Agjërimi zgjat nga agimi deri në perëndim të diellit, duke u përmbajtur nga ushqimi, pija dhe kënaqësitë trupore. Agjërimi nuk është vetëm abstenim fizik nga haja dhe pija, por është edhe disiplinë shpirtërore dhe morale. Ai nënkupton ruajtjen e gjuhës nga fjala e keqe, përmbajtjen e shikimit, pastrimin e mendimeve dhe largimin nga çdo veprim që cenon dinjitetin e njeriut dhe vlerën e agjërimit.
Ky muaj është një mundësi e çmuar për reflektim, lutje, lexim të Kur’anit, përforcim të lidhjes sonë me Krijuesin dhe me njëri-tjetrin. Ramazani na mëson durimin, përulësinë dhe mirënjohjen. Ai na kujton rëndësinë e solidaritetit dhe të bamirësisë, duke na afruar më shumë me ata që janë në nevojë dhe duke forcuar ndjenjën e përgjegjësisë shoqërore.
Në një kohë sfidash globale, mesazhi i Ramazanit është mesazh paqeje, mirëkuptimi dhe bashkëjetese. Si komunitet, kemi përgjegjësinë që përmes sjelljes sonë të dëshmojmë vlerat e larta të fesë sonë, siç është respekti, toleranca dhe dashuria për të mirën e përbashkët.
Me rastin e fillimit të këtij muaji të shenjtë, urojmë që agjërimi, lutjet dhe veprat tuaja të pranohen. Lusim Zotin e Madhërishëm që ky Ramazan të sjellë paqe në zemrat tona, harmoni në familjet tona dhe begati në shoqërinë tonë.
Për hajr dhe me plot bekime muaji i bekuar i Ramazanit!
Me respekt,
Hfz. Mehas Alija
Kryetar i Komunitetit Musliman Shqiptar në Zvicër (KMSHZ)