Zhvillimet kanë ardhur me ritme të shpejta që pas sulmeve ajrore të ndërmarra nga Shtetet e Bashkuara ndaj objekteve bërthamore iraniane gjatë natës së kaluar.
Sipas informacioneve zyrtare, avionët amerikanë goditën tre objektiva kryesorë në Iran: Fordo, një impiant pasurimi uraniumi i fshehur në një zonë malore të largët; Natanz, një nga qendrat kryesore të programit bërthamor iranian; dhe Isfahan, një tjetër qendër teknologjike e rëndësishme.
Zyrtarët izraelitë deklaruan se ishin në « bashkërendim të plotë » me SHBA-në për planifikimin e sulmeve, duke e konfirmuar koordinimin mes aleatëve në këtë operacion të ndjeshëm
Sipas burimeve diplomatike, Uashingtoni kishte kontaktuar Teheranin të shtunën përmes kanaleve diplomatike, duke i bërë me dije se sulmet ajrore përbënin të gjithë ndërhyrjen e planifikuar dhe se nuk kishte qëllim për përshkallëzim të mëtejshëm. Më vonë, Sekretari Amerikan i Mbrojtjes, Pete Hegseth, deklaroi se këto sulme nuk kishin për qëllim ndryshimin e regjimit në Iran
Ende nuk dihet saktësisht shkalla e dëmit të shkaktuar në objektet bërthamore, por autoritetet amerikane pretendojnë se programi bërthamor iranian është « rëndë i dëmtuar ».
Ndërkohë, Agjencia Ndërkombëtare për Energjinë Atomike (IAEA) ka konfirmuar se nuk ka pasur rritje të niveleve të rrezatimit jashtë zonave të goditura, duke qetësuar shqetësimet për ndotje radioaktive.
Situata mbetet e tensionuar, ndërsa komuniteti ndërkombëtar ndjek me shqetësim zhvillimet dhe mundësinë e një përshkallëzimi të mëtejshëm në rajon.