Analisti politik Nexhmedin Spahiu, ka kritikuar presidenten e Kosovës Vjosa Osmani, që sipas tij, kur flet anglisht Kosovën e quan ne gjuhen serbe “Kosovo” e jo ne shqip “Kosova”!
Spahiu ka thënë se Osmani dhe shumë të tjerë po i jepin argument “të artë” ministrit të Jashtëm serb Ivica Daçiq, i cili edhe në mbledhjen e fundit të Këshillit të Sigurimit të Kombeve të Bashkuara, e përmendi këtë gjë.
“Ivica Daciq në KS të OKB: « vetë fakti se e quani Kosovo (në gjuhën angleze) e nuk keni emërtim shqip për këtë vend, tregon se nuk është juaja po e jona ». Gjithë tekstet e mia anglisht janë me « Kosova » dhe jo « Kosovo ». Kështu ka shqiptuar dhe shkruar edhe Xhafer Deva , Ibrahim Rugova , Ramush Haradinaj , Albin Kurti, Donika Gërvalla etj. Por presidentja Vjosa Osmani-Sadriu e shumë të tjerë vazhdimisht e shqiptojnë dhe shkruajnë « Kosovo » dhe ja se çfarë argumenti të artë i japin Daçiqit”, ka shkruar analisti Spahiu, në një postim në Facebook.
Spahiu, edhe më herët kishte kritikuar Osmanin, se përkundër që flet gjuhën angleze, ajo nuk i thotë Kosovës “Kosova” në anglisht, por “Kosovo”. Sipas tij, kjo është një ndjenjë inferioriteti. Ndërsa, për kryeministrin Albin Kurti, Spahiu kishte thënë se ai tregon dinjitet sa herë që Kosovën e quan “Kosova” edhe kur flet në anglisht.