Prishtine, 22 mars -Parlamenti i Kosovës u mblodh të hënën, 37 ditë pas zgjedhjeve të 14 shkurtit, duke i hapur rrugën formimit të qeverisë së re.
Pas betimit të 114 deputetëve të parlamentit 120 vendesh, me 69 vota u zgjodh kryetari i parlamentit Glauk Konjufca nga lëvizja Vetëvendosje, e cila doli fituese në zgjedhje, duke siguruar 58 vende në parlament.
Zoti Konjufca, pas zgjedhjeve të 6 tetorit të vitit 2019 ishte zgjedhur kryetar parlamenti, një post në të cilin qëndroi për një kohë të shkurtër. Ai u pasua në atë post nga Vjosa Osmani, ndërsa udhëhoqi ministrinë e Jashtme në qeverinë e ish-kryeministrit Albin Kurti, e cila u rrëzua më një mocion mosbesimi më 25 mars të vitit 2020.
Konjufca tashmë do të marrë përsipër edhe punën e ushtruesit të detyrës së presidentit të Kosovës dhe pritët të mandatojë kryetarin e lëvizjes Vetëvendosje, Albin Kurti për formimin e qeverisë së re.
Sipas Kushtetutës, presidenti i propozon parlamentit kandidatin për kryeministër, i cili jo më vonë se 15 ditë pas emërimit, paraqet përbërjen e qeverisë. Pritet që lëvizja Vetëvendosje të çojë përpara procesin e formimit të qeverisë menjëherë, mbase gjatë ditës së stome.
Ajo që është ende e paqartë është se çfarë do të ndodhë më postin e presidentit. Sipas Kushtetutës, zgjedhja e presidentit kërkon në dy raundet e para të votimit dy të tretat e votave, ndërsa në raundin e tretë, mund të zgjidhet me shumicën e thjeshtë prej 61 deputetësh, por në votim duhet të marrin pjesë të paktën 80 deputetë.
Tani për tani Partia Demokratike dhe Aleanca për Ardhmërinë e Kosovës e kanë hedhur poshtë mundësinë që të votojnë kandidaten e lëvizjes Vetëvendosje, Vjosa Osmani, ndërsa Lidhja Demokratike ka paralajmëruar bisedime me zonjën Osmani para se të marrë një vendim.
Dështimi për të zgjedhur presidentin, mund të çojë vendin sërish në zgjedhjeve të parakohshme.